دستور يا سيادنا

المواد المقترحه للتعديل

المادة 75: واللي بتقول ان الريس مصري وابوه مصري وامه مصريه ومتجوز مصريه والا يكون حصل هو او احد والديه على جنسيه اجنبيه

مصر كانت طاردة لكل المثقفين والمتعلمين والليبراليين من بدايه ثورة العسكر في 52 وطبعاً الـ 30 سنه اللي فاتوا كانوا اسود 30 سنه في تاريخ مصر
تخيلوا احمد زويل لو فضل في مصر كان زمانه دكتور في علوم اسكندريه بيتخانق مع الطلبه علشان يشتروا الكتاب .
هى انها بتسمح لعبود الزمر - قاتل السادات - بالترشيح بينما دكتور فاروق الباز ل .ا

المادة 76: ينتخب الرئيس عن طريق الاقتراع ويلزم ان يكون حاصلاً على تأييد ما لا يقل عن 30000 صوت موزعه على 15 محافظه إذا كان مستقلاً ويجب مراعاه عدم ازدواج الاصوات .
اما اذا كان ليه كرسي في مجلس الشعب او الشوري فيمكنه ترشيح نفسه
وغير كدة تكون قرارات اللجنه المنظمه للانتخابات نهائيه لا يجوز الطعن فيها - يعني لو شكينا في نتائج انتخابات الرئاسه مش من حقنا الاعتراض
المشكله ان المادة ديه فيها عدم مساواه بين اعضاء المجالس والمستقلين
علاوة على ان اللي جاهزين لمجلس الشعب هما بقايا الحزب الوطني والاخواان ودول حرفيه انتخابات
وده عنوان مقاله في المصري:الإخوان»: سنبذل جهودنا لتكون نتيجة الاستفتاء على تعديل الدستور «نعم»

المادة 77: بتقول مدة الرئاسه 4 سنين تجدد مرة واحدة - وديه حلوة

المادة 93: تختص المحكمة الدستوريه العليا - يعني مفيش استئناف لحكمها - الفصل في صحه عضويه اعضاء مجلس وتعتبر العضويه باطله من تاريخ ابلاغ المجلس - وديه حلوة .

المادة 139: يعين رئيس الجمهوريه خلال 60 يوم من توليته الحكم نائب الرئيس ويكون خاضع لنفس شروط ترشيح الرئيس
المشكله
انه ممكن يرشح اي حد ابنه ..اخوه .. جوز خالته ..


المادة 148: يعلن الرئيس حاله الطوارئ وتعرض على المجلس في خلال 7 ايام .... وفي كل الاحوال لا تزيد حالة الطوارئ عن 6 اشهر ولا يجوز مدها الا باستفتاء عام
المشكله
انه ممكن يحصل زي ما كان بيحصل في عهد الرئيس المخلوع حادثه طائفيه في اي حته يحطوا شويه تعديلات ومن ضمنهم تمديد حاله الطوارئ لغايه لما ربنا يحلها وساعتها نرجع تاني زي ما كنا قبل الثورة

المادة 189: فقرة مضافه
لكل من رئيس الجمهوريه بعد موافقه مجلس الوزراء ولنصف اعضاء مجلسي الشعب والشوري طلب اصدار دستور جديد
المشكله
لاحظ انه لا يلزم الرئيس او اعضاء المجلس بإصدار دستور جديد
ومن يضمن ان الرئيس سيرغب في تعديل دستور يجعله رئيس كل حاجة - جلال عامر بتاع تخاريف في المصري اليوم اقترح اننا نمضي رئيس الجمهوريه على شيكات بدون رئيس علشان يرضي يتنازل عن سلطاته

وتتولي جمعيه من 100 عضو ينتخبهم اغلبيه اعضاء مجلس الشعب من غير المعينين اعداد الدستور في مدة 6 اشهر ويعرض على رئيس الجمهوريه ثم الاستفتاء العام
المشكله هنا كبيره
اولاً: قانوناً مجلس الشعب لازم يكون 50% من اعضاءه عمال وفلاحين - جهله او تعليم على قدهم مع كامل الاعتزاز والاحترام ليهم
ثانياً: زي ما اتفقنا ان معظم اعضاء مجلس الشعب اخوان وبقايا الحزب الوطني
يعني اللجنه اللي هتعدل الدستور هتكون منتخبه من 98 عضو من االاخوان وبقايا الوطنى والجهله وانصاف المتعلمين + 2 -باحسن تقدير - من الناس اللي بتفهم .
ولكم ان تتخيلوا شكل الحياه في مصر بعد ذلك